ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងអំណរគុណជូនចំពោះនាយករដ្ឋមន្ត្រីប្រទេសវៀតណាម ឡាវ ប្រធានាធិបតី និងនាយករដ្ឋមន្ត្រីនៃសាធារណរដ្ឋប្រជាមានិតចិន ដែលបានជូនពរសម្ដេច និងគណបក្សប្រជាជនសម្រាប់ជោគជ័យនៃការបោះឆ្នោត។
សម្ដេចតេជោ បានសរសេរនៅលើបណ្ដាញទំនាក់ទំនងសង្គម Twitter របស់សម្ដេចកាលពីល្ងាចថ្ងៃទី២៦ ខែកក្កដា ឆ្នាំ២០២៣ ដោយបានលើកឡើងថា៖ «ទោះបីលទ្ធផលផ្លូវការមិនទាន់បានប្រកាសតែការហៅទូរស័ព្ទ និងផ្ញើសារមកជូនពរក្រៅផ្លូវការ គឺជាកាយវិការមិត្តភាពស្រឡាញ់រាប់អានគ្នា បន្ទាប់ពីកម្ពុជាចាត់តាំងការបោះឆ្នោតបានល្អជាមួយ និងជោគជ័យរបស់គណបក្សប្រជាជនកម្ពុជា»។
យោងតាមលទ្ធផលបណ្ដោះអាសន្នរបស់គណៈកម្មាធិការជាតិរៀបចំការបោះឆ្នោតបង្ហាញថាក្នុងចំណោមពលរដ្ឋដែលបានចេញទៅបោះឆ្នោតជាង ៨,២លាននាក់ មានពលរដ្ឋប្រមាណ ៦,៣លាននាក់បានបោះឆ្នោតគាំទ្រផ្ដល់ក្ដីទុកចិត្តឱ្យគណបក្សប្រជាជនកម្ពុជា។ តាមរយៈលទ្អផលនេះត្រូវបានគេរំពឹងថាបក្សនេះនឹងគ្រប់គ្រងអាសនៈច្រើនលើសលប់នៅក្នុងសភាដល់ចំនួន ១២០អាសនៈ៕